ଜୀବନସାଥୀ (ଭାଗ ୪୮)
ଲେଖିକା: ଶ୍ରୀମତୀ ମମତା ମହାନ୍ତି (ସାମନ୍ତରାୟ)
Author: Smt Mamata Mohanty (Samantaray)
…..
ସମସ୍ତେ ମନଖୁସିରେ ଏକାଠି ଖାଇବାବେଳେ ଅଙ୍କିତ ହୃଷୀକେଶଙ୍କୁ କହିଲା, ବାବା, କାଲି ଆମେ ବେଳାବେଳି ଘରୁ ବାହାରିଯାଇ, ବାହାରେ ବ୍ରେକଫାଷ୍ଟ କଲେ ଭଲ ହେବନି ? ହୃଷୀକେଶ ଓ ସୁଧାକର ଏକା ସାଙ୍ଗରେ କହିଲେ, ବହୁତ ଭଲହେବ | ହୃଷୀକେଶ ନନ୍ଦିନୀ ଓ ସମରଙ୍କୁ କହିଲେ, ତମେମାନେ ବି ଆମ ସାଙ୍ଗରେ ଚାଲ, ବାହାଘର ଆଉ ଅଳ୍ପଦିନ ରହିଲା, ଆମକୁ ସପିଙ୍ଗ ରେ ସାହାଯ୍ୟ କରିବ | ସମର କୁଣ୍ଠିତ ସ୍ୱରରେ କହିଲା, ଅତି ବେଶି ହେଲେ, ଦୁଇଦିନ ପାଇଁ ମୁଁ ଯାଇପାରେ, ତାଠାରୁ ଅଧିକ ଦିନ ରହି ପାରିବିନି | କାଲି କିନ୍ତୁ ମୁଁ ଆପଣମାନଙ୍କ ସାଙ୍ଗେ ଯାଇ ପାରିବିନି, ମତେ ଅଫିସ ଯାଇ ଛୁଟି ଆଣିବାକୁ ପଡିବ | ସମର କଥା ଶୁଣି ନିର୍ମଳାଙ୍କ ମୁହଁ ଶୁଖିଗଲା | ସମର କହିଲା, ଗୋଟେ କାମ କରିବା | ନନ୍ଦିନୀ ପିଲାଙ୍କୁ ନେଇ ଯାଉ | ମୁଁ ଅଫିସରୁ ଛୁଟି ନେଇ, ଯେମିତିହେଲେ, ସନ୍ଧ୍ୟାରେ ପହଞ୍ଚିଯିବି | ହୃଷୀକେଶ କହିଲେ, ଅଫିସ କଥା, ନିୟମ କାନୁନ ମାନିବାକୁ ପଡିବ | କିନ୍ତୁ ତମେ ଯେମିତିହେଲେ ଆସିବ , ଛୁଟି ମିଳିଲା ନାହିଁ ବୋଲି କହିବନି | ସମର ହସି ହସି କହିଲା, ନାଁ ଭାଇ, ସେମିତି ହେବନି |
ଯେତେ ଚଞ୍ଚଳ କାମ ସାରିଲେ ବି ସମସ୍ତେ ବାହାରୁ ବାହାରୁ ଆଠଟା ହେଲା | ତା ଭିତରେ ନନ୍ଦିନୀ ସମର ପାଇଁ ରୋଷେଇ କରି ଦେଇଥିଲା | ସୁବଳ ଟାକ୍ସିରେ ସୁଧାକରଙ୍କ ପରିବାର ବସିଲେ ଓ ଇନୋଭାରେ ବାକି ସମସ୍ତେ ବସିଲେ | ଅଙ୍କିତର ଖୁସିର ସୀମା ନଥିଲା | ମଝିରେ ବାରମ୍ବାର ଗାଡି ରୋକି କେତେବେଳେ ଜଳଖିଆ , କେତେବେଳେ ଚା’, ପୁଣି କେତେବେଳେ କାକୁଡି ଇତ୍ୟାଦି ସେମାନେ ଖାଉଥିଲେ | ବିଭିନ୍ନ ସ୍ଥାନ ବୁଲି ସେମାନେ ଦୁଇଟା ବେଳେ ଲଞ୍ଚ କଲେ | ଅପରାହ୍ନରେ ନାଲି ଚା’ ପିଇ ଘରେ ପହଞ୍ଚିବା ବେଳକୁ ସନ୍ଧ୍ୟା ହୋଇ ଯାଇଥିଲା | ତା ଭିତରେ ଖୁସି ଗପ, ଫଟୋ ଉତ୍ତୋଳନ , ଅନ୍ତାକ୍ଷରୀ ଇତ୍ୟାଦି ସବୁ ଚାଲିଥିଲା | ଏକାସାଙ୍ଗେ ଡିନର ଖାଇଦେଇ ଘରକୁ ଯିବାପାଇଁ ହୃଷୀକେଶ ସୁଧାକରଙ୍କୁ କହୁଥିଲେ | କିନ୍ତୁ ପେଟ ଖରାପ କଥା କହି, ସୁଧାକର ରାଜି ହେଲେନାହିଁ |
ରାତି ଆଠଟା ବେଳକୁ ସମର ଆସି ପହଞ୍ଚିଗଲା | ତା ପରଦିନ କଣ କଣ କାମ ଅଗ୍ରାଧିକାର ଭିତ୍ତିରେ କରାଯିବ, ତାର ତାଲିକା ଚୂଡାନ୍ତ କରି, ସମସ୍ତେ ରୁଟି ତରକାରୀ ଖାଇ ଶୋଇପଡିଲେ | ସକାଳେ ହୃଷୀକେଶ ଚା’ ପିଇ ସମ୍ବାଦପତ୍ର ପଢୁଥିବାବେଳେ ସୁବ୍ରତଙ୍କ ଫୋନ ଆସିଲା | ସେ କହିଲେ, ମୋର ତ ଝିଅ ଚାଲିଗଲା, ତେଣୁ ସବୁଦିନ ପାଇଁ ଆପଣଙ୍କ ସହିତ ମୋର ସମ୍ପର୍କ ତୁଟିଗଲା | ଏଥର ଆପଣ ମୁଁ ଦେଇଥିବା ଟଙ୍କା , ସୁନା ଓ ଯୌତୁକ ସାମଗ୍ରୀ ଇତ୍ୟାଦି ଯାହା ମୁଁ ଆପଣଙ୍କୁ ବାହାଘର ବେଳେ ଦେଇଥିଲି, ସେ ସବୁ ମତେ ତାଲିକା କରି, ଫେରେଇଦେଲେ ଭଲ ହୁଅନ୍ତା |
ତାଙ୍କ କଥା କିଏ ଶୁଣୁଛୁକି ନାହିଁ, ହୃଷୀକେଶ ଏପଟ ସେପଟ ଚାହିଁ ଦେଖିଲେ | ତାପରେ ଗେଟ ପାଖକୁ ଯାଇ କହିଲେ, ମୁଁ ଏକଥା ବହୁତ ଦିନରୁ ଭାବିଲିଣି | କାଳେ ଆପଣ ଖରାପ ଭାବିବେ, ସେଥିପାଇଁ କିଛି କହୁ ନଥିଲି | ମତେ ଆପଣ କିଛିଦିନ ସମୟ ଦିଅନ୍ତୁ, ଆସନ୍ତା ରବିବାର ସୁଦ୍ଧା ଆପଣଙ୍କର ସବୁ ଜିନିଷ ଆପଣଙ୍କ ଘରେ ମୁଁ ପହଞ୍ଚେଇ ଦେବି | ଏହାପରେ ସୁବ୍ରତ ହଁ କି ନାଁ କିଛି ନକହି ଫୋନ ରଖିଦେଲେ |
ହୃଷୀକେଶ ତାପରେ ଆସି ପୂର୍ବପରି ଚା’ ପିଇ ପେପର ପଢିବାରେ ମନଦେଲେ | କିନ୍ତୁ ଆଉ ତାଙ୍କୁ ପେପର ପଢିବାକୁ ଇଚ୍ଛା ହେଉ ନଥିଲା | ଖୁସିର ମୁହୂର୍ତ୍ତରେ ଏକଥା ଘରେ କହି, ସେ କାହାର ମନ ଅଶାନ୍ତି କରିବାକୁ ଚାହୁଁ ନଥିଲେ | ନନ୍ଦିନୀ ଯିବାପରେ ଯାହାକିଛି କରିବେ ଭାବି ସେପର୍ଯ୍ୟନ୍ତ ନୀରବ ରହିବାକୁ ସେ ଉଚିତ ମନେକଲେ | (କ୍ରମଶଃ)
…..
…..
…..
Smt Mamata Mohanty
ଶ୍ରୀମତୀ ମମତା ମହାନ୍ତି
ଲେଖିକାଙ୍କୁ ଓ “ସୁରଭି ଓଡିଆ” ପରିବାରକୁ ଉତ୍ସାହିତ କରିବା ପାଇଁ ଲେଖାକୁ
(୧) ଏହି ୱେବ୍ସାଇଟ (ସୁରଭି ଓଡିଆ)ରେ ଲାଇକ (ପସନ୍ଦ) କରନ୍ତୁ , ମନ୍ତବ୍ୟ ଦିଅନ୍ତୁ ଓ ସେୟାର କରନ୍ତୁ ।
(୨) ଏହି ୱେବ୍ସାଇଟ(ସୁରଭି ଓଡିଆ)ର ଫେସବୁକ-ପେଜ ରେ ମଧ୍ୟ ଲାଇକ (ପସନ୍ଦ) କରନ୍ତୁ , ମନ୍ତବ୍ୟ ଦିଅନ୍ତୁ ଓ ସେୟାର କରନ୍ତୁ ।
ପୁଣିଥରେ ଧନ୍ୟବାଦ
